جذع الأمل

اليوم حابة أكتب عن موضوع كل العالم بيحكي فيه اسمه الخلايا الجذعية هالموضوع صارله فترة العالم مشغول فيه و بيعملوا ابحاث و تجارب ليشوفوا نتائجه و هل مفيد او ضار و مدى نسبة نجاحه و قد ثبتت فعالية هذا التطور.....

هلأ بدي أراجع أنا و أنتم كم من معلومة أخدناها زمااان و احنا صغار بالمدرسة فاكرين لما كنا نقول جسم الانسان يتكون من عدة أجهزة التنفسي , الهضمي , البولي , العصبي , التناسلي و هذه الأجهزة تتكون من عدة أعضاء و العضو يتكون من مجموعة أنسجة و النسيج مكون من عدة خلايا و أن أصغر وحدة هي نواة الخلية فاكرين هالمعلومة فاكرين " الخلية " هدي هي مربط المفرس متصورين أديش هي صغيرة بس هالمفعوسة سبحان الله هي اللي مشية الجسم بانتظام طبعا بقدرة الله عز و جل ....

هلأ يمكن الموضوع يبدأ يصعب بس أنا بحاول بقدر الامكان أبسط الموضوع لانه الكلمات صعبة شوي

3 أنواع من الخلايا هي التي تكون جسم الانسان هي 

 

mesenchymal stem cell  الخلايا الجذعية الوسيطة  

                                                        

  haemapoeitic stem cell  الخلايا الجذعية المنتجة للدم

                                                               

            

  embryonic stem cell الخلايا الجذعية الجنينية

هلأ الخلايا الجذعية الوسيطة الها القدرة انها تتحول لأي نوع خلية من خلايا جسمنا حسب هي وين موجودة و ايش الجسم بده تنتج النوع المسئول عن الخلايا المطلوبة يعني لو الجسم محتاج يبني عظم هدي الخلايا تنقسم و تنتج osteoblast خلية بناءالعظم و اذا الجسم محتاج ألياف تنتج fibroblast الخلايا الليفية .

طيب هلأ هدي الخلايا وين موجودة

هالخلايا الجذعية الجنينية و الوسيطة موجودة في نخاع العظام bone marrow و دم الحبل الري و سائل الحبل السري و اسمه   wharton's jelly و هدا أغنى مصدر للخلايا الجذعية  . 

 و طبعا احنا عارفين انه الحبل السري بينقطع عند الولادة

طيب عاد لو صار المرض بالعمر الكبير؟ زي ما احنا عارفين الجسم كل ما كبر بتقل الخلايا و تقل فعاليتها فكمية هالخلايا لو حصلنا عليها من النخاع العظمي أقل من لو أخدناها من الحبل السري و هنا صار الجدل و البحث في السنين الماضية كيف يحصلوا على هالخلايا من المولود و يخزنوها لوقت عوزة هههه

و الأجانب كالعادة بيشغلوا البطيخة تاعتهم وما شاء الله البطيخة بتطرح ثمار زاكية طبعا وصلوا لنتيجة و فعلا صاروا يطبقوها من سنين و أحلى شي بالموضوع انه الجسم عند الحاجة يتم زرع هذه الخلايا و تنقسم حسب النوع المطلوب من الخلايا دون مقاومة الجسم الها مش زي ما بيصر كتير مع عمليات زرع الكبد ,, و السبب بسيط مش احنا قلنا ناخده من المولود من الحبل السري من wharton's jelly  يعني لسه هالخلايا ما اكتمل نوعها كتير و ما عندها جهاز مناعي و بالتالي بتدخل الجسم و ما بيتعرف عليها و تنقسم للخلية اللي بدنا اياها...

و طبعا كيفية الحصول و الحفاظ على الخلايا معقدة و تحتاج تقنيات و خبرات عالية الأجانب بفكروا 100 سنة قدام أما احنا العرب نستنى المعلومة تيجينا بالمعلقة ما علينا خلينا بالمهم هلأ , يعني بجمل بسيطة بيتم تنظيف الحبل السري من الدم و بيعزلو wharton's jelly و بيحطوه في جهاز تبريد مخصص لعدة ساعات و بعدين في عدة محاليل و بعدين كمان مرة بحفظوه بدرجة حرارة معينة الا ان يتم الاستفادة منه بوقت تاني ...

و طبعا هالعلم أعطى ابتسامة أمل لكتير من المرضى خصوصا مرضى السكر من الاطفال عن طريق زراعة خلايا بنكرياس تكون سليمة و كمان أعطت الأمل لمرضى الشلل الرعاش بزراعة خلايا عصبية ...

و على فكرة مع هالاكتشاف الانسان ممكن يعيش أكتر من أول لانه بسهولة حيصيروا يقضوا على المرض بل كمان استعاضة أعضاء كاملة سليمة للمريض ...

                                                                

بتمنى أكون أعطيتك معلومة جديدة و ما أكون استخدمت كلمات صعبة وما تكونوا زهقتوا من القراءة لانه الموضوع جلف شوية

 و اذا بتحبوا تشوفوا أكتر افتحوا اللينك و التعليق بالعربي

  http://www.youtube.com/v/YXQ_SJsnWnE&rel=0

و اذا عجبكم الموضوع انتظروا أخر أكثر جدلا طرحه الدكتور أحمد زويل في ندوة له  و لكن أحتاج للقراءة عنه أكثر ... وما زال العلم يتطور :)))))

وجعلي قلبي

الحمدلله و الشكر لك يا رب الله أدمها نعمة علينا يا أرحم الراحمين

 من الأشياء اللي ما بتخليني أطلع او تنكد عليا بالطلعة لما اشوف الغلابة 

 ياما في أطفال هيك بكل العالم

 و المشكلة الواحد ما بيعرف هم فعلا محتاجين و لا يتدعوا الحاجة

اليوم طلعت أشتري لبس و الحمدلله توفقت بالشراية و احنا مروحين اتذكرنا انه بدنا شوية خضرة فقلنا معنا السيارة خلينا نروح سوق الحي السادس هدا سوق شعبي بأكتوبر و  هي تاني مرة أروح عليه هناك بتشوف الغني و الفقير تنعدم بينهم المستويات و بيصير الكل يفاصل على قرش لانه بصراحة بتفرق الاسعار عن المحلات اللي داخل المدينة الضعف و تلات أضعاف فمحرزة النزلة هناك بتكون ... اليوم زي أول يوم رحت عليه قبل 3 ايام بحاول أتأمل الناس بس أتأمل و هناك تذكرت غزة كتير لانه بشبه سوق السكة كله بسطات و سوق فراس كله كارات بحمار مكس زي ما تقولوا و الشي اللي ضحكني كنت واقفة عند كارة بتبيع قواني فخار و زبدية يعني welcome to gaza

و اليوم أنا واقفة و صافنة انتبهت على واحد عجوز شكله أبرص المهم فجأة لقيته بيمشي بسرعة على بسطة ولد صغير بيبيع بصل أخضر بصراحة منظره مغري جدا المهم أنا لقيت العجوز مد ايده على البصل و نقى وحدة و رجع على بسطته و قشر البصلة و حطها و من غير غسيل أنا ايش حطيته برأسي أنا فكرته بيسرق من الولد فحطيته براسي و بعد ما حط البصلة صار بردو يمشي بسرعة لغاية ما وصل لواحد بيبيع جبنة و أنا براقب فيه لأنا انصدمت من اللي شفته طلع جنيه و أعطاه لبياع الجبنة فبياع الجبنة قله لأ أصر العجوز انه يدفع حقها و بردو البياع ما رضي ياخد و اعطاله جبنة علما أن قالب الجبنة حقه 5 جنيه و الكيلو ب 20 جنيه و رجع لبسطته كمان بسرعة

فساعتها حسيت بتأنيب الضمير اني فكرت العجوز حرامي بس لانه هو كل شي كان بعمله بسرعة فكرته سراق طلع البياعين عارفينه غلبان يا حرام جعان و ايش غداه بس هالبصلة  و قطعة الجبنة  من غير خبز عنجد ساعتها قلبي اجعني عليه كيف هالدنيا صعبة و احنا مش حاسين ابدا ....

و شفت كمان بنت صغيرة بتبيع بقدونس و بتجري ورا الرجال عشان يشتري منها و هو بيغوش عليها بقولها مش عاوز صغير الي معك مش عاوز بردو ما هان عليا ليش يغوش عليها و بنت صبية بتبيع خس يمكن من عمري هالبنت طبعا الحال بغزة زي هيك و يمكن أسوء بس أنا بغزة ما كنت أنزل سوق الخضرة و أشوف هالمناظر كنت بس اشوف الشحاتين الصغار على الاشارة و اللي في سوق الرمال و البلد و كان بردو قلبي يتقطع عليهم و كالعادة ما بنعرف من فعلا محتاج و مين يدعي الحاجة .....

و كمل الموضوع معي مع اولاد الغفير اللي بيجوا يحملو الأغراض علشان ياخدو جنيه و اللي ضحكني انهم بتقاتلو على الجنيه يعني اليوم كانو 3 بيلعبوا و معهم ابن غفير تاني المهم ناديناهم كلهم علشان يحملوا فاجوا الاربعة فأولاد الغفير ما عجبهم هدا الرابع ياخد جنيه فقالولو سيب الاكياس و احنا مصممين يحمل معهم حرام بيضل طفل زيهم لهم النحسا على الدرج أخدوا منه الاكياس من غير ما نشوفهم و كملوا على بيتنا ...على الجنيه بيقاتلوا بعضهم مع انهم قبل دقيقة كانوا بلعبوا سوا...الله يعينهم و يرزقهم الواحد لازم يشكر ربه صبح و ليل على هالنعمة و الصحة و انه اجتنا الفرصة نتعلم و ندعي الله و نجتهد علشان ربنا يرزقنا لانه لكل مجتهد نصيب...

 آميـــــــــــــــــــــــــــــــــن يا رب العالميـــــــــــــــــــــن

تقليد أعمى

عنجد شي كتير هبل عاملين حالنا بنفهم و بنجاري التطور و بالاخر احنا مجرد مقلدين و يا ريت حتى بنحاول نحط لمستنا الا انه على العمياتي نقلد الغرب ...

بدينا بسوبر ستار و بعدها ستار اكاديمي و برنامج عرضته LBC نفس برنامج house swap وبرنامج  من  سيربح المليون و هلأ برنامج لحظة الحقيقة و Arab's got talent

يعني يا ريت لو حتى بنغير الاسم شو هالهبل هدا نفس الاسم بالضبط و حتى نفس الأسئلة و نفس التعليقات و نفس الموسيقى يعني حتى المجاملة بنقلدهم فيها بالله شو ضل علينا كمان لحتى نقلدهم .

بالله هالمنتجين و المخرجين ما بيستحوا على حالهم وين ابداعهم مفكرين المشاهد العربي جاهل و ما بتفرق معه اذا في نسبة كبيرة منهم هيك فبردو في كتير شايفين تفاهة هالبرامج المقلدة باستثناء من سيربح المليون لانه الا انه كمان تقليد أعمى بس على الاقل ثقافي الواحد كان يستفيد من المعلومات.

 بس بصراحة استفزني حاجتين من اعلانات هالبرامج اولا في برنامج لحظة  الحقيقة نفس السؤال لنفس عرق الشخص كان السؤال موجه لرجل أمريكي من أصل أفريقي في نسخته الامريكية و نفس السؤال سئل لرجل عربي لا ادري جنسيته تحديدا من أصل أفريقي هل سبق و أن قبلت رشوة أثناء عملك كشرطي شو هالتفاهة هدي لهالدرجة مستغفلينا لهدرجة هم مفكرينا عمي

و تاني شي في برنامج المواهب الفظيعة قال كان في شاب فلسطيني بلعب كونج فو و ماسك عقلة و نار بالله شو هالموهبة في الموضوع  و الغريب انه التلاتة المقدمين اعجبوا فيه  , و في سيدة مصرية ترقص شرقي بالعصاة و هم مكيفين عليها بالله هدي موهبة تتقدم هو احنا ناقصنا انحلال اخلاقي فوق اللي خارق فيه المجتمع و اللي صدمني انه عمر أديب بقوله انتي رقاصة انتي رقاصة و هي بتضحك و مبسوطة و كمل انتي وردة شمعة منورة سكرة جملته السخيفة دايما بالله عليك مش شايف حالك ..شو بيحكي  هدا ...

و الولد الصغير اللي كتير عجبني بس بصراحة ردة فعلهم كانت كتير مبالغة اي نعم الكلمات قوية بس الطفل مش هالموهبة اللي عنده في القاءالشعر يعني لو كان هو اللي كاتب و بيقي كان عنجد يستحق اكتر من هيك

بس عموما حلو انه اسم فلسطين ظاهر على الشاشة و مش بس الناس تشوفنا حجر و دبابة لاننا بشر بنحب و بنكره بنلعب و بنكتب

بس يا ريت يكون لامع في برنامج ثقافي لانه احنا المفروض نكون مثقفين.

بالمناسبة احكي عن تلفزيون فلسطين اللي عايش بعالم اخر شكله بحط أشياء و بيطلع مذيعين و مذيعات يعني بصراحة بسدوا النفس و يا ريت عندهم خبرة الا انهم بيطلعوا يهجوا تهجاية والله خيبة على هيك سلطة فلسطينية و على هيك تلفزيون تابع لهم يعني يا ريت بحطوا شي مفيد كله تفاهة بتفاهة و سياسة من وجهة عباس و شلته , مرة يتيمة شفت برنامج مسابقات ثقافية و بالخر قطعوه علشان واحد منهم يحكي لقاء يعني يا فرحة ما تمت هههه

عودة الى برنامج المواهب في بنت بحرينية غنت أغنية أحلام ما يصح الا الصحيح على فكرة هدي البنت طلعت في برنامج ستار صغار و غنت نفس الاغنية السنة اللي فاتت فانا استغربت يعني انعدمت الاغاني اللي تغنيهم من سنة نفس الاغنية بتغنيها مش حافظة غيرها بس ما عجبني هالتكرار و كأنه صوتها بس حلو بالاغنية و لا شو القصة !!!

يعني ما في قناة فكرت تعمل مسابقة الابداع العملي و العلمي؟؟؟؟؟ و لا وحدة حتفكر

 

برطن أسباني

يعني عاملة زي اللي صدقت حالي اني بحكي بطلاقة بالاسباني هم سنتين فيهم  اللي تعلمت فيهم أسباني و كل سنة بتعلم كلمتين و كلمة و بنساهم ...لا بس هالسنة أخدت الموضوع على محمل الجد و تعلمت احكي و اكتب أسباني و صار كل اللي بعرفني كل ما يششوفني بسألني كيف احكي هالجملة وشو معنى هدي و احكي معنا أسباني قال حيفهموا عليا لما أحكي :))))
هلأ انا  اهتمامي اني اتعلم لغة تالتة صاروا 6 سنين و كل اجازة صيفية بقول بدي اروح على المعهد الاسباني بس كالعادة المشوار بعيد من أكتوبر للمهندسين فما يبرضوا أهلي اروح و بيروح الصيف بين سفر و طلعات و فسح يا اما لما أخلص امتحانات الجامعة بتكون دورات صارلها اسبوعين بادية او العدد اكتمل بس قبل سنتين الموضوع صار بالنسبة الي تحدي يا بتعلم اللغة و بتقنها يا بعتبر حالي فاشلة و صرت أدور على النت على مواقع للتعليم و أجيب كتب و سي دي و هيك أشياء و فعلا لقيت موقع رهيب بيعلم اللغة زي ما بنقول تاتا و خطوة خطوة و في ناس متتخصيين بتسألهم و بيردوا على أسئلتك و اشتركت فيه و هناك تعلمت كتير أشياء و صرت انمي حالي من حالي اقرأ بعض القصص القصيرة بالأسباني و احاول أفهم عن شو تحكي و أسمع أغاني بالاسباني و اقرأها علشان اللفظ يكون ممتاز و هيني لحتى الان ماشية بالموضوع و ان شاء الله بصير احكي أسباني زي ما بحكي عربي و انجليزي ..

تراشق أفكار

بسم الله الرحمن الرحيم

أبدأ اليوم أول كتابة أول مدونة في مدونتي غرور الكبرياء , يمكن الاسم غريب بعض الشي و لكن مع الوقت ستتضح ملامح سبب تسميتها بهذا الاسم....

تراشق أفكار ! غريب أنا بعرف تراشق بالحجارة و لكن في بالي الان عدة أفكار للمدونة الاولى و لكن ايا منهم لن يتناول قضية محددة

  منذ 3 اسابيع تقريبا بدأت اجازة نصف السنة , حيث أستيقظ من حيرتي بما سأفعله بهذا اليوم ليكون مختلفا عما قبله  ابدأ سأقوم بعمل كذا و كذا و كذا و سأكلم فلانة و علانة و لكن في نهاية اليوم لا أفعل سوا المساعدة في اعمال المنزل و التفكير في شغل العيادة و متى ستبدأ الجامعة كي استمتع بالعمل في عيادات الجامعة و في نفس الوقت اناقض نفسي و أقول الحمد لله ارتحت من المرضى و هم العلامات وأشاهد قناة الجزيرة الوثائقية و MBC4 كأي شابة عربية. 

لقد حاولت جاهدة أن أستفيد من الاجازة و قراءة بعد كتب الأدب و الروايات و لكن لم تعجبني ايا مما بدأت بقراءتهم بس بالعكس في بعض أحيان أستغرب كيف لهذه الرواية ان تكون عالمية مثلا الحب في زمن الكوليرا و بصراحة اضغط على نفسي كي أقرأها و لكن بلا جدوى لم أعرها اي اهتمام أنا أتوقع لانها على الكمبيوتر و ليست كتاب افقد استمتاعي بالقراءة  :( و لكني أريد فعلا ان أقرأها لكونها مشهورة جدا... المتشائل للمرة الثانية أحاول قراءتها و أيضا لم أكملها و في كل مرة تستوقفني بعض النقاط في الصفحات الاولى و لا أدري سبب وجودها بالقصة وأتركها لأنني أحس الكاتب مثل ما نقول بالعامية "بيشرق و بيغرب بالكلام" بس هذه المرة انا مصممة اني اقرأها للنهاية.. 

و من عنده رواية ممتعة للقراءة او كتاب يحوي معلومات مختلفة  فيتفضل و يدلني عليه لأني أحب قراءة الكتب التي تحوي معلومات و ليس قصص حب  و فلسفة فقط .